Wednesday, July 29, 2009

Micro-Kwento #3: One Shot

"Sir, okay 'tong sniper scope na 'to. Long-ranged 'yan sir, at kayang-kaya niyong makita 'yung malayong 'yun," sabi ng dealer sa lalaki, sabay turo du'n sa may malayo, kabilang na ang isang maliit na bundok at ilang mga gusali na may ilang libong metro ang layo mula sa tindahan ng mga baril, rifle, at iba pa na kinalulugaran nila.

"Hmm," tugon ng lalaki, at inilagak ang ipinagbibiling sniper scope sa kanyang pinakamamahal na rifle. Lumalabo na kasi ang orihinal na teleskopyo ng kanyang alagang "Accuracy International Arctic Warfare," at kinakailangan niya itong palitan bilang paghahanda sa nalalapit na paligsahan sa sniping.

Matapos ang ilang minutong pagkabit, itinutok ng lalaki ang kanyang rifle sa malayong tanawin, at dahan-dahang isinilip ang kanang mata sa bagong-kabit na scope. Sa kanyang pagkakasilip, namilog ang mata niya, unti-unti siyang ngumiti, at tuwang-tuwa sa mga nakikita niya. Sa bawat pag-adjust niya sa zoom nito ay maliwanag niyang nakikita ang mga nangyayari sa kalayuan na hindi talaga mapapansin kapag wala kang telescope o binoculars. Sa harapan lang ng ilong niya ay kitang-kita niya ang pagkilos ng mga tao, paglipad ng mga ibon, pag-andar ng mga sasakyan, at iba pa -- lahat ay may ilang libong metro ang layo.

"Okay ba, sir? Sa scope na 'yan, lamang na lamang na kayo sa iba pang mga snipers. Tiyak na asintado niyo ang mga target. With perfect precision," sinabi ng dealer sa nalilibang na lalaki. Umusal lang ang lalaki ng "hmm" at nagpatuloy sa pag-adjust ng zoom ng scope habang tinatanaw niya ang maasinta nito.

Bumwelo ulet ang dealer. "Schmidt And Bender talaga ang ine-endorse ng Accuracy International, sir. Pwede kayong mamili kung fixed ba o variable ang magnifi--," naririnig ng lalaki ang patuloy na sales talk sa kanya ng dealer, subalit unti-unting nawawala ang mga salita sa kanyang pandinig. Para bang paunti-unti siyang nabibingi, hanggang sa dahan-dahan na lang yatang nabura sa kawalan ang paligid niya.

"Kung gusto niyo sir, pwede tayong maghanap ng depende sa budget niyo. 'Pakita ko pa sa inyo 'yung iba pa naming nasa stock," ito na lang ang nasabi ng dealer, at tumalikod siya papunta sa kahang idini-display ang iba't-ibang mga paraphernalia ng mga armas. Kinuha niya ang susi na nakasukbit sa kanyang sinturon, at binuksan ang kandadong magiting na nagbabantay sa kaha. Hawak-hawak na niya ang isang catalog ng mga io-offer niya nang biglang may pumunit na malakas, nakagugulat, at nakabibinging pagputok na nanggaling sa kanyang likuran.

"BANG!"

Umalingawngaw ang pagputok na sa sobrang lakas e nagkabasag-basag ang lahat-lahat ng mga salamin ng mga kaha. At ang dealer, na nasa gitna ng pagka-gulantang, ay halos tumilapon ng ilang talampakan mula sa kinatayuan niya. Mga ilang saglit din siyang nakaramdam ng pagka-paralisa, at nang makatayo na siya, nakita niya ang lalaki na matikas pa ang pagkakatayo, na akala mo e walang nangyari, hawak-hawak ang rifle. Gulat na gulat ang dealer nang nakita niyang basag ang salaming bintana na malamang e tinagusan ng bala.

"BAKIT?! BAKIT, SIR?! ANO'NG GINAWA NIYO?!" Wala na halos sa ulirat ang dealer na hinihingal, nanginginig at natataranta pa sa mga pangyayari.

"'Yung asawa ko." Nagsindi ng sigarilyo ang lalaki at umalis.

Nagtakbuhan. Nagkagulu-gulo. Mabilis ang mga pangyayari.

"NEWS FLASH! Isang babae at isang lalaki ang natagpuang patay sa isang kwarto ng condominium kaninang tanghali. Ayon sa paunang imbestigasyon, ang babae ay tama ng bala sa ulo, samantalang ang lalaki ay may tama din ng bala sa may ari nito. Pareho silang hubo't-hubad."

(Salamat sa isang kaibigan dahil sa mga ideya sa likod ng kwentong ito. At salamat din sa isang ka-opisina para sa mga karagdagang payo sa pagsusulat nito.)



Picture Of The Day


'Yun lang. [Graph Jam]

Music: Kiko Machine - Val Sotto
Mood: sleepy
Quote: "To assume makes an ASS out of U and ME." (Gil Grissom, "CSI: Crime Scene Investigation")

Monday, July 20, 2009

Kakain Na! Chronicles #1: Komoro Soba

Dahil isa akong frustrated food blogger at hindi ako sing-bigtime na katulad ng mga hardcore na "foodies," gagawa na lang ako ng "Kakain Na! Chronicles." Mahilig kasi akong mag-foodtrip, kaya naisipan ko na lang gumawa ng isang "food diary."

Komoro Soba, SM Megamall - Upper Ground Floor

Na-curious akong kumain sa Komoro Soba, kaya nitong maulang Lunes ng gabi ay naisipan kong kumain duon matapos ang isang stressful na araw sa opisina. Swak dahil gutom na ako at sweldo din naman.

Nakita ko sa menu ng Komoro Soba ang iba't-ibang uri ng soba at udon. Meron din silang rice bowls at iba pang karaniwang Japanese side dishes na katulad ng miso, gyoza, maki, atbp. Pagkatapos kong magtaka kumbakit wala yata ang aking paboritong yakisoba, um-order ako ng Yakiudon set meal. Set meal, bale yakiudon na may kasamang maliit na katsudon. Um-order din ako ng California Maki (masyado na akong gutom para mag-isip ng side dish, pero naisip ko gyoza sana ang o-order-in ko) at Pepsi bilang panulak.

Pagkatapos ng ilang minutong paghihintay, dumating na din ang inaasam-asam ko.



Yakiudon, maki, katsudon, at Pepsi. Hindi na masama para sa isang hapunan.



Ang pangunahing tampok, yakiudon. Sobrang satisfied ako sa pagkakagawa nila nito, dahil hindi ito katulad ng iba na kakaunti lang ang noodles at pinaramihan na lang ng gulay para masabing marami. At wagi naman ang sarap nito, ayos ang pagkakaluto ng udon. Okay na ang isang platong serving nito, pero kung katulad mo akong may bituka na singlaki ng fish pond, tiyak na mabibitin ka. Mabuti na lang at set meal ang in-order ko, na may kasamang katsudon.



Add-on ito sa yakiudon. Mabuti kung ganu'n, dahil nga sa malamang e kulang sa'kin kung 'yun lang lang. Pasok na din ang serving size nitong katamtamang mangkok, at siyempre pa'y seryoso ang nilalaman nitong kanin, tonkatsu (pork cutlet), at itlog. At katulad ng yakiudon, isang malaking check ang sarap nito.



Dahil ako 'yung tao na madalas e kailangang may side-dish, sinama ko din ang California maki sa order ko. Para ayos.



210 pesos ang total damage, pero sobrang busog sa dami at lasa. Paniguradong babalik ako dito para i-sample ang iba pa nilang mga soba at udon offerings. (Sabi na nga ba, hindi ko masyadong thing ang food blogging.)

Gutumin sana kayo pagkabasa niyo nito.



Picture Of The Day


Cookies ayos! [All Funny Pictures]

Music: Michael Jackson - Rock With You
Mood: blank
Quote: "When someone proposes a challenge, there's only one acceptable response: I'm READY!" - Spongebob Squarepants (through "his" Twitter)

LinkWithin

Related Posts with Thumbnails