Monday, January 11, 2010

Kung Magmamahal Ka Ng Mahilig Sa Video Games

Kung susukatin ang aking pagka-adik sa video games, pwede kong bigyan ang sarili ko ng 8 out of 10.

Nu'ng bata ako ay nagka-Family Computer ako. Sa pagkaka-alala ko, pagpatak ng alas-kwatro ng hapon at kung natulog ako ng tanghali, pwedeng-pwede akong mag-Family Computer hanggang alas-sais ng gabi (kung hindi ako naka-siyesta, walang Family Computer). Kinarir ko mula Battle City, Goonies, Tetris, Legend of Kage, Ice Climbers, B-Wings, Spartan, at napakarami pang iba na hindi ko na maalala ang karamihan sa mga kinahumalingan ko. Nu'ng Grade 6 ako e nagkaroon naman ako ng personal computer, at nag-adik din ako siyempre sa mga PC games. Medyo sablay nga lang dahil mababa ang specs ng PC ko nuon, pero nakapaglaro naman ako ng StarCraft, Command & Conquer, MechWarrior, Duke Nukem, Doom, Star Wars games, Need for Speed, CounterStrike, Warcraft III, at iba pa. Nu'ng High School naman ako e nagpaka-sasa ako sa PlayStation, lalo na nu'ng nagtayo ang half-brother ko ng arkilahan ng PlayStation. Tatlo ang unit namin, at lagi akong updated sa mga laro nuon. Marami akong PS One games na natapos sa track record ko, na sa sobrang dami e hindi ko na mailista at maalala. Maghapon-magdamag, nasa harap ako ng TV, nagpipindot sa controller at kinakarir ang pagle-level up ni Alucard at Squall, o hinahabol para pasabugin ang sasakyan ni Sweet Tooth, o para makumpleto ko ang lahat-lahat ng lisensya at kotse sa Gran Turismo, o ma-master ko 'yung fatality ni Liu Kang, o para mapalabas ko si Tofu sa Resident Evil 2.

Sa ngayon na nagtatrabaho ako, laging busy at pagod, laging kulang sa oras, antukin, at bagung-bago na ang generation ng gaming, meron akong Nintendo DS Lite at Sony PlayStation Portable Slim & Lite. Siguro kung may sarili akong kwarto at TV sa bahay, Sony PlayStation 3 ang sunod kong gustong bibilhin. Pero kasi may siyam na oras akong nagtatrabaho kada araw kaya halos hindi na talaga ako nakakapagbabad sa paglalaro. Ang dami-dami ko pang mga bagong games na gustong tapusin, kasama na pati ang mga lumang games na gusto ko ding laruin. At para maging updated ako, kinakailangan ko pang magtanong o makita ang trip ng nasa circle of friends ko, hindi katulad noon na automatic ko na lang nalalaman kung ano ang mga cool na games. Hindi na ako gaanong ka-"hardcore gamer" hindi katulad noong panahon ng PS One. Nakakalaro na lang ako ng DS o PSP kapag nasa biyahe o bago matulog.

At dahil frustrated ako sa kawalan ng oras para mag-adik, sinulat ko na lang 'to. Wala lang. Pagbigyan niyo na ako kahit 'yan lang ang kaya kong isulat. (Habang ginagawa ko ito ay nagtatrabaho din ako at nasa tabi lang ng work PC ko ang PSP. Gusto ko nang simulan 'yang God of War: Chains of Olympus na 'yan pagkatapos ng Rock Band Unplugged.)

Kung Magmamahal Ka Ng Mahilig Sa Video Games

Kung magmamahal ka, piliin mo 'yung mahilig sa video games, dahil isu-shoot down niya ang lahat-lahat ng zombies at enemy units para lang sa'yo.

Kung magmamahal ka, piliin mo 'yung mahilig sa video games, dahil kung may totoong kotse man siya o wala ay makikipag-unahan siya palagi sa puso mo.

Kung magmamahal ka, piliin mo 'yung mahilig sa video games, dahil araw-araw ay nagle-level up ang kanyang pagmamahal sa'yo sa tulong ng experience points.

Kung magmamahal ka, piliin mo 'yung mahilig sa video games, dahil marami siyang strategy para sa next move ng pagpapaligaya sa'yo.

Kung magmamahal ka, piliin mo 'yung mahilig sa video games, dahil siya na ang sasagot ng mga puzzle na bumabagabag sa buhay mo.

Kung magmamahal ka, piliin mo 'yung mahilig sa video games, dahil mas maraming adventure at action ang darating sa buhay mo.

Kung magmamahal ka, piliin mo 'yung mahilig sa video games, dahil mahilig man siya sa simulation ay sineseryoso pa rin niya ang nararamdaman at sinasabi niya sa'yo.

Kung magmamahal ka, piliin mo 'yung mahilig sa video games, dahil marunong man siyang mag-basketball o hindi ay sisiguraduhin niyang makakarami siya ng points sa buhay mo.

Kung magmamahal ka, piliin mo 'yung mahilig sa video games, dahil ipaglalaban ka niya sa kahit na kanino, kahit ten stages pa 'yan o final boss.

Kung magmamahal ka, piliin mo 'yung mahilig sa video games, dahil ikaw lagi ang pipiliin niyang kanta.



Picture Of The Day


Saklap.

Music: Hikari Sentai Maskman Opening Theme
Mood: lazy
Quote: "I did no work today and still got paid!" (Wally)

LinkWithin

Related Posts with Thumbnails