Monday, July 5, 2010

Wala Na. Tulog Na.

Labinlimang oras. 'Yan ang normal na tagal ng tulog ko. Kapag nakatulog ako ng labinlimang oras, maganda ang gising ko at nararamdaman kong kumpleto ang tinulog ko. Kung ang karamihan ng mga "mas normal" sa akin e sapat na sapat na ang walong oras, sa akin e hindi pa ako babangon sa kama niyan. Tatlo lang naman ang makakapagpatayo sa akin sa kama: kapag gutom na, kapag late na sa office, at kapag nakisabay sa'kin ng tayo 'yung laging tumatayo sa umaga (ito 'yung pinakamadalas).

Pero siyempre hindi ko pwedeng gawin 'yang 15-hour sleep marathon na 'yan kapag weekdays dahil sa trabaho. Kaya kinailangan kong i-adjust ang sarili ko at nakasanayan ko nang makuntento ng anim na oras na tulog. Actually, limang oras na tulog lang 'yan dahil 'yung isang oras diyan e ang tagal ng pagbangon ko sa kama pagkagising ko (snooze).

Nandahil diyan, isa salita ang sobrang naging associated sa akin. Ito daw ako, sabi ng mga kaibigan ko. Aminado naman ako na ito ako. ANTUKIN. Antukin ang tamang isang salita, maliban sa POGI, na magde-describe ng sakto sa'kin. Madali akong antukin anumang oras, at bilangin mo lang ang ngipin ng katabi mo e makikita mo na akong tutulog-tulog.

Sa opisina, gusto ko sanang gawin ang ilan sa mga techniques na alam ko para maka-simple ako ng tulog habang wala pang lunch break. Nagawa mo na ba ang alinman sa mga ito?

1) Praying Mantis. Clasp your hands and rest your head on them na para bang nagdarasal ng sobrang mataimtim. Kapag tinapik ka ng boss mo, mag-sign of the cross ka at sabihing, "pinakinggan na rin ang aking mga panalangin."

2) Bolpen. Maglagay ng bolpen sa ilalim ng mesa. Sa ibabaw naman ng mesa, gawin mong unan sa ulo ang kanang bisig mo, at ilambitin mo naman ang kaliwang kamay mo sa may tapat lang ng bolpen. Kapag tinapik ka ng boss mo, pulutin mo ang bolpen at sabihing "nahulog po 'yung bolpen, sir."

3) Hard Worker. Kung madalas nasa likod ang boss mo, hawakan mo lang ang keyboard at mouse mo, tapos sumandal ka lang sa office chair mo at simulan ang maitim na balak. 'Wag kalilimutang magbukas ng Microsoft Excel at hayaan na ito ang nakikita sa monitor mo. Kapag tinapik ka ng boss mo, sabihin mong, "sir, ano nga ba 'yung formula nu'n? Kanina ko pa hinuhukay sa utak ko e."

4) Musikero. Okay ito kapag meron kang jacket na may hood. Magsuot ng headset. Italukbong mo sa ulo mo ang hood ng jacket, at matulog. 'Wag sasandal para mas dramatic ang effect, dahil maghi-headbang ka sa pagkakatulog mo. Parang totoo lang. (Natutunan ko ito sa kaopisina ko mula sa dati kong pinagtrabahuan.)

5) Exorcist. 'Eto ang pinaka-hardcore. May isa akong kaklase sa kolehiyo noon na sobrang namangha ako. Sa unang tingin, aakalain mong nakikinig siya ng mabuti sa instructor dahil sa siya ay nakadilat at malalim ang pagkakamasid. Ang masaya pa, kapag lumilingon sa kanya ang instructor, tumutungo pa siya na parang nakikinig nga. Pero ang hindi alam ng instructor, tulog ang kolokoy kong kaklase. Tulog na nakadilat. True story.

Itutuloy ko pa sana ang post na ito, pero inaantok na ako. Kung ikaw ay may nalalamang techniques, i-share niyo naman sa comments.



Picture Of The Day


'Nuff said. (Source: Failbooking)

Music: Ace of Base - It's A Beautiful Life
Mood: Disappointed.
Quote: Everything will be okay in the end. If it's not okay, then it's not the end.

LinkWithin

Related Posts with Thumbnails